Actualidade tecnolóxica, análise de trebellos e aplicacións, trucos, sorteos… En galego e dende Galicia. Todo isto é Mallando no Android! Falamos con Iago Varela, o seu editor xefe.
Un pouco de historia. Quen está detrás de Mallando no Android? Cando e como comezou a vosa andaina?
Detrás deste proxecto estamos un grupo de frikiños (frikis riquiños) aos que nos entusiasma todo o que ten a ver coa tecnoloxía en todas as súas formas e variantes, especialmente o mundo Android. No día a día estamos catro persoas (Álvaro, Uxío, Luis e eu), pero tamén hai outras persoas que colaboran de maneira esporádica facéndoo posíbel.
Nun primeiro momento os contidos que hoxe están en Mallando no Android pertencían a unha sección do blog de difusión científica Mallando na e-ira, até que o 1 de xullo de 2010 decidimos que o proxecto merecía un espazo propio, polo que consideramos esa data como a fundacional.
Cantas persoas pasan pola vosa web ó día?
Visítannos entre 8.000 e 10.000 usuarios ao mes, a meirande parte desde Galiza e outras partes do Estado, aínda que tamén temos tráfico desde o veciño Portugal e Brasil polo parecido do idioma.
O último da actualidade, reviews e probas de trebellos, apps, trucos… Coa cantidade de información que xera Android, que criterios seguides na escolla de temas?
No noso ADN vai facer “a malla”, escoller entre a inxente cantidade de información que se produce a diario para ver cal traballamos e cal deixamos de lado. O principal criterio que seguimos é cubrir as necesidades de información da nosa audiencia, e iso implica achegar a actualidade e visibilizar aplicacións, proxectos ou servizos que poidan serlles de utilidade.
Que é o que suscita máis interese?
Sen dúbida os artigos nos que analizamos produtos, xa sexan teléfonos ou outros gadgets, son os máis exitosos entre o noso público, mais tamén os que afectan a empresas galegas ou servizos de uso masivo.
E como xestionades a vosa relación coas marcas?
Temos un contacto fluído coas marcas que, en boa medida, é parte do éxito de Mallando no Android. Grazas a iso temos acceso a feiras e eventos internacionais, que é onde se producen as novas, mais tamén aos dispositivos que analizamos para que a xente poida coñecer os produtos antes de mercalos.
Con que recursos ou apoios conta Mallando no Android?
A ningún dos que formamos parte de Mallando no Android nos gusta a publicidade nas webs, polo que é algo que descartamos implementar no noso espazo. Polo tanto escollemos un sistema de micromecenado no que as usuarias poden colaborar unha doazón puntual ou unha suscrición mensual de 1, 2 ou 5 € ao mes. Os cartos que recadamos con este sistema empregámolos para cubrir os gastos da páxina, acudir a eventos etc.
Que valores comparte o voso equipo? Se lembras algunha anécdota, este é o momento Iago!
Temos un código ético que fixemos entre todos e que guía o noso traballo, pero sen dúbida o mellor valor é o da amizade, que é o que nos une: ademais de compañeiros, somos amigos. Anécdotas temos un carro delas, pero unha que me vén agora á cabeza foi o día que un de nós volvía dunha viaxe e ao facer escala en Barcelona perdeu o DNI; como non lle deixaron coller o voo de conexión tivemos que mobilizarnos para conseguirlle outro modo de transporte que lle permitise volver á casa da maneira máis rápida. Conseguimos traelo de volta!
Iago Varela, no Mobile World Congress
Calquera que teña verdadeira paixón por Android pode colaborar cos seus artigos ou unboxings, non si?
Si! O único que se necesita son as ganas. Temos permanentemente abertas as portas a que a xente que comparta a nosa afección colabore co proxecto da maneira que mellor saiba, ben sexa escribindo un artigo, analizando un produto ou mesmo facendo un unboxing do móbil que mercou.
O hashtag #AndroidEnGalego ten tras de si unha historia que vale a pena contar.
Desde logo! Unha das nosas señas de identidade é o uso do galego, mais para nós era algo frustrante que Android non estivese dispoñíbel no noso idioma. Por iso puxemos en marcha a campaña #AndroidEnGalego na que conseguimos implicar a particulares, empresas, asociacións, as tres Universidades galegas e outras institucións para conseguir que Google implementase o galego en Android. Tras meses de traballo de difusión, unha carta dirixida a Sundar Pichai e varias reunións co equipo de Google España conseguimos que o galego fose unha das linguas incluídas na versión 5.0 de Android, e desde aquela en todas as demais.
Nestes anos que levades androidizando o mundo, que foi o mellor de todo?
Temos varias anécdotas, mais unha que gardamos con moito cariño foi cando tivemos acceso a un prototipo dun móbil (o Moto G de segunda xeración) e puidemos publicar en exclusiva mundial un artigo coa primeira imaxe e as características técnicas. Nesa semana Mallando no Android foi portada dos medios tecnolóxicos de todo o mundo, un éxito maiúsculo para unha publicación modesta como a nosa.
E agora, cara onde camiñades?
Desde hai algún tempo decidimos ir máis aló de Android e incluír tamén outros temas tecnolóxicos relacionados, porque cremos que melloran o contido xeral do blog, e a idea é que estes temas sigan gañando protagonismo. Tamén temos ganas de aumentar os contidos en vídeo, aínda que estamos pendentes de facer unha inversión en equipos que nolo permita 🙂
Para a dinahosting é un gusto acompañarvos 😀
A nós encántanos ir da man de Dinahosting! Levamos colaborando desde o comezo e só podemos ter boas palabras, tanto pola fiabilidade como polo trato, cun soporte extraordinario. Lembro especialmente a axuda cando fixemos o cambio de hosting para usarmos o .GAL, grazas á cal saiu todo ben á primeira. Así dá gusto!